ODIONGAN, Romblon – Arestado ang isang lalaking drayber matapos makarekober ng baril at mga bala ng halughugin ang kanyang bahay sa bisa ng Search Warrant na isinagawa kahapon ng 5:00 ng umaga ng Enero 19, 2024 sa Barangay Amatong, Odiongan, Romblon.
Kinilala ng pulisya ang suspek na si Larry Familara y Suñer, 47 anyos, may kinakasama, drayber, at residente ng Barangay Amatong, Odiongan, Romblon.
Ayon sa Odiongan Municipal Police Station (OMPS) isang pinagsanib na operation na OPLAN PAGLALANSAG OMEGA (Implementation of Search Warrant ) ang isinagawa ng mga operatiba ng CIDG Romblon PFU na pinangunahan ni PMAJ Dick A. Cale, Provincial Chief (lead unit), kasama ang PIU Romblon tracker team at Odiongan MPS para iimplementa ang Search Warrant No. 38-24 na inisyu noong Enero 16, 2024 ni Hon. Donna Borda Pascual, Executive Judge ng Regional Trial Court, Branch 81, Romblon, Romblon, sa kasong paglabag sa RA 10591 (Comprehensive Law on Firearms and Ammunition Regulation Act) sa bahay ng suspek.
Nakumpiska sa tirahan ng suspek ang isang kalibre .22 revolver na walang serial number at brand, dalawang piraso ng bala para sa .22 na revolver at apat na pirasong bala para sa kalibre .38 na rebolber.
Ang pagsagawa ng search warrant, pagkumpiska at pagmarka sa naturang mga ibendensya ay sinaksihan nina Barangay Kagawad Bee Fodulla Tolentino at Brgy Tanod John Agrabio Prudente ng Barangay Amatong, Odiongan, Romblon.
Ang inarestong suspek at ang nakumpiskang mga ibedensya ay dinala sa opisina ng CIDG Romblon PFU para sa kaukulang dokumentasyon at disposisyon. (TMM)
