CAJIDIOCAN, Romblon – Nahaharap sa kasong Attempted Homicide ang isang lalaki matapos nitong barilin ang kanyang kapatid dakong 4:30 ng hapon nitongg nakalipas na araw sa Barangay Poblacion, Cajidiocan, Romblon.
Ang biktima ay kinilala ng Cajidiocan Municipal Police Station (CMPS) na si Edgardo Ramilo Mortel, 69 anyos, person with disability, habang ang itinuturong suspek ay ang kapatid nito na si Inocencio Ramilo Mortel, 67 taong gulang, walang tabaho at kapwa residente ng Barangay Poblacion, Cajidiocan, Romblon.
Sa imbestigasyon ng Cajiocan MPS, habang nakaupo umano ang biktima sa terrace ng kanilang bahay ay nakita niya na may dadaan na tricycle sa harapan ng kanilang tirahan kung saan nakasakay ang suspek na umano’y nasa ilalim ng impluwensya ng alak kasama ang dalawa nitong anak na babae.
Napansin umano ng drayber ng tricycle na bumunot ng baril na kalibre .45 ang suspek at itinutok sa direksyon ng biktima at ipinutok sabay sigaw na, “Patyon ta ikaw!” (papatayin kita).
Mabilis namang tumakbo ang biktima sa loob ng kanilang bahay na muling binaril ng suspek ngunit nagmintis rin ito tulad ng nauna.
Pagkatapos ng nasabing insidente ay umalis umano ang suspek dala ang ginamit na armas.
Isinumbong naman ng anak ng biktima sa Cajidiocan MPS ang naturang pangyayari at agad na nagsagawa ng hot pursuit operation ang kapulisan at agad naaresto ang suspek.
Isinuko naman ng maybahay ng suspek sa pulisya ang ginamit na baril ng suspek.
Inihahanda na ng Cajidiocan MPS ang kasong Attempted Murder na isampa sa Provincial Prosecutor’s Office laban sa nasabing suspek. (RSun News Desk)
